SAISONSTART 11.07.2023

Mir freued üs u fest, eu z'verkünde chöne, dass üsi Saison startet. 🥰
Wieso erst etz? 🤔
Wie ihr viellicht scho paar mol glese hend, nehmend mir bi de Pfleg vo üsne Beeri Rücksicht uf d'Natur und ihri chline Bewohner. Konkret heisst da, dass mir mit sehr wenig Dünger schaffed und vor allem kei chemische Mittel isetzed. Mir pushet üsi Beeri nöd, sondern wartet eifach ab und lueged was üs d'Natur schenkt. Sie sind rief, wenns rief werded und es git so viel, wies git. Aber wie gseit, etz isches so wiit. 😉 Üse Verkaufswage het abem Zistig, 11.07.2023, wieder täglich für eu göffnet. Nebst de Beeriprodukt werded das Johr no paar neui Produkt aztreffe si. 
Chömed verbi go luege. 🤗

Die japanische Wiibeeri hend ihri Blätter etz au voll entfaltet🌿

Will die japanische Wiibeeri am zweijöhrige Trieb Beeri träged, chömed etz scho die neue Trieb use für nögst Johr. Swipe➡️

Unchrut.. Immer wieder es Thema bi üs im Beerifeld🥴

Do mir üses Feld möglichst schonend wönd pflege, chömed bi üs kei chemische Bekämpfigsmittel in Isatz.❌
 

Trotzdem münd mir s'Wachstum vom Unchrut bitz unterdrücke. Sust würed üsi Beeristrücher drin under goh. Als Lösig hend mir üs für Holzschnitzel entschiede. Mit dene mulchet mir üsi Beerireihe. Mulche het zudem de Vorteil, das d'Bodefüechtigkeit viel länger erhalte bliebt und üsi Strücher somit immer öpis z'trinke hend😋

Zum d'Bienli möglichst nöch a üsi Strücher anezlocke, lönd mir aber viel Blueme ide Beerireihene stoh und zwüschet em Mulch füreluege. 
Denn ohni Bienli, kei Beeri🤷🏻‍♀️🐝🥰 

Soooo mir lüftet endlich üses Gheimnis🤫

Wie akündet, hend mir es neus Beet agleit, zum üses Sortiment z erwietere. I dem Beet werded verschiedeni Chrüüter und essbari Blueme abbaut🌿🌼

Zum eine wärded d Bienli sicher Freud ha ade Blüemli🌼🐝 aber au alli Tee-Fanatiker dörfed sich freue! Us de Chrüütli und de Blüete entstönd nämli verschiedeni Tee-Mischinge😋🍵

Vo links noch rechts ➡️ Zitronemelisse ➡️ Frauemantel ➡️ Baldrian 

Die erste Johannisbeeri zeiget sich au scho... 

D'Heidelbeeri sind graglet voll mit Blüete!🌺 

Fliessigi Helfer🐝 💪

D'Bienli sind üs scho wieder fliessig am helfe, dass es e gueti Beeri-Saison git.💪🥰 Aber nöd nur d'Bienli sind wieder aktiv i üsem Beeri-Feld, sondern es blüehed au scho wieder die erste Blüemli. Es schiint fast, als wär de Früehlig acho. 😍🌺

Sibirischi Blaubeeri 29.04.2023

Die erste sibirische Blaubeeri zeiget sich scho.🥰

Idrück Februar 2023

Es paar Idrück, wie üsi Beeri im Februar deher chömed. 
Vo "ich bi no total im Winterschlof🥶" bis zu "ich gspür de Früehlig und wött scho mini Blättli usrolle😍☀️🌱". Die sibirische Blaubeeri chönd de Früehlig uf jede Fall chum meh erwarte🥰

Info Februar 2023 

 So gaaaanz bitzli chamer doch de Früehlig i de Sunnestrahle scho erahne😍☀️ üsi Beeri sind zwor nonig usem Winterschlof erwache, aber es lauft trotzdem scho öpis i üsem Beerifeld. Mir sind gad ide Vorbereitige für es neus Projekt. I de diesjöhrige Saison wönd mir eu nämli es breiters Sortiment abüte. Für das, sind mir gad z'mitzt drin ide Beetvorbereitige. Was uf dene 18 m² wird wachse, werded ihr bald erfahre. 🌱🥰 

Strücher schniide isch agseit!✂️ 

S'Schniide vomene Beeristruch het zum eine de Zweck, d'Form z'erhalte. Zum andere söll das de Beeriertrag fördere und Chrankheite vorbüge. Dur s'Usliechte wird d'Sunneistrahlig für die nögst Saison erliechteret. Das führt zunere guete Usriefi und macht d'Beeri schmackhafter. Bi zu dichten Wuchs tröchnet de Struch nach eme Niederschlag nur sehr langsam ab. Dur die höher Luftfüechtigkeit wo debi entstoht, werded Pilzchrankheite gförderet. So, das sind glaubs gnueg Gründ defür, wieso mir üsi Beeristrücher ab und zue müend schniide😉
 
Letzt Wuche sind die japanische Wiibeeri ade Reihe gsi. Die japanische Wiibeeri bilded am zweijöhrige Trieb Beeri. Das heisst, dass alli Trieb, wo das Johr Beeri treit hend, nögst Johr kei Beeri meh werded bilde. Demit de Struch sini ganzi Energie i die neue Trieb, wo bereits im Verlauf vo de letschte Saison gwachse sind, setzte chan, werded die alte Trieb entfernt. Bi de japanische Wiibeeri isches ganz eifach z'erkenne, weli Trieb alt sind und dementsprechend weg münd und weles, dass die neue sind. Ufem erste Bild gseht mer, dass die neue junge Trieb no schön frisch und rötlich usgsehnd. Alles was bruun isch, muess weg, wills die alteTrieb sind. Ufem zweite Bild gseht mer wie die abtreite Beeritrieb vorne usgsehnd. Mi glaubt's fast nöd, aber do dra sind die diesjöhrige, feine japanische Wiibeeri gwachse...🥰